මාර්ග අතරින් ආර්ය අෂ්ටාංගික මාර්ගය ශ්‍රේෂ්ඨයි. සත්‍යයන් අතර චතුරාර්ය සත්‍යය ශ්‍රේෂ්ඨයි. ධර්මයන් අතර විරාගය (නිවන) ශ්‍රේෂ්ඨයි. දෙපා ඇත්තන් අතර බුදුරදුන් ශ්‍රේෂ්ඨයි.

දැක්ම පිරිසිදු කරගන්න (නිවන් දකින්න) තියෙන්නේ මේ පාර විතරයි. වෙන පාරක් නෑ. මේ පාරේ ගියොත් මාරයාව මුළා කරන්න පුළුවන්.

මේ පාරේ ගියොත් ඔයාලට දුක ඉවර කරන්න පුළුවන්. (රාගාදී) හුල් ගලවන මේ මාර්ගය මම දේශනා කළේ මමම අවබෝධ කරගෙන.

ඔයාලා තමයි මහන්සි වෙලා වැඩ කරන්න ඕනේ. බුදුවරු කරන්නේ පාර පෙන්නන එක විතරයි. මේ පාරේ යන අය මාර බැම්මෙන් නිදහස් වෙනවා.

'සියලු සංස්කාර අනිත්‍යයි' කියලා නුවණින් දකිනකොට, සංසාර දුක ගැන කලකිරෙනවා. පිරිසිදු වෙන්න (නිවන් දකින්න) තියෙන පාර මේකයි.

'සියලු සංස්කාර දුකයි' කියලා නුවණින් දකිනකොට, සංසාර දුක ගැන කලකිරෙනවා. පිරිසිදු වෙන්න තියෙන පාර මේකයි.

'සියලු ධර්ම අනාත්මයි' (මගේ නෙවෙයි) කියලා නුවණින් දකිනකොට, සංසාර දුක ගැන කලකිරෙනවා. පිරිසිදු වෙන්න තියෙන පාර මේකයි.

නැගිටින්න ඕන වෙලාවට නැගිටින්නේ නැති, තරුණ වුනත් කම්මැලි, හොඳ අදහස් යටපත් කරන, අලස කෙනාට ප්‍රඥාවේ මාර්ගය හම්බ වෙන්නේ නෑ.

වචනය රැකගන්න. හිත සංවර කරගන්න. කයින් අකුසල් කරන්න එපා. මේ තුන් දොර පිරිසිදු කරගත්තොත් බුදුවරු පෙන්නපු නිවන් මග සම්පූර්ණ කරගන්න පුළුවන්.

භාවනාවෙන් තමයි නුවණ ඇති වෙන්නේ. භාවනා නොකළොත් නුවණ නැති වෙනවා. දියුණුවට සහ පිරිහීමට තියෙන මේ මං දෙක දැනගෙන, නුවණ වැඩෙන විදියට වැඩ කරන්න.

කැලේ (කෙලෙස්) කපන්න, ගස් කපන්න එපා. කැලේ නිසා බිය හටගන්නවා. කෙලෙස් වනයයි, පොඩි පඳුරුයි (ආසාවයි) ඔක්කොම කපලා නිවන් දකින්න.

පිරිමියෙකුට කාන්තාවක් ගැන තියෙන ආසාව පොඩ්ඩක් හරි තියෙනකල්, කිරි බොන වස්සෙක් අම්මා පස්සේ යනවා වගේ එයා සංසාරේ යනවා.

සරත් කාලෙට පිපෙන කුමුදු මලක් අතින් කඩලා දානවා වගේ, තමන්ගේ ආසාව කඩලා දාන්න. බුදුරදුන් දේශනා කරපු නිවන් මගම වඩන්න.

'මම වැස්ස කාලේ මෙහෙ ඉන්නවා. සීතල කාලෙයි රස්නේ කාලෙයි මෙහෙ ඉන්නවා' කියලා මෝඩයා හිතනවා. (මරණය නමැති) අනතුර එයා දකින්නේ නෑ.

දරුවෝ, සත්තු, ධනය ගැන මත්වෙලා, ඒවගෙම ඇලිලා ඉන්න මිනිහව, නිදාගෙන ඉන්න ගමක් වතුර ගලලා අරන් යනවා වගේ මරණය අරගෙන යනවා.

මරණය ආවම දරුවොන්ට, තාත්තට, නෑදෑයන්ට අපිව බේරගන්න බෑ. කවුරු හිටියත් වැඩක් නෑ.

මේක දැනගෙන, නුවණැත්තා සිල්වත් වෙලා, නිවනට යන පාර ඉක්මනින්ම සුද්ද කරගන්න ඕනේ.