වෛර කරන මිනිස්සු අතරේ වෛර කරන්නේ නැතුව අපි හරිම සුවෙන් ජීවත් වෙනවා. ඒ අය අතර අපි අවෛරීව ඉන්නවා.

(කෙලෙස්) ලෙඩ තියෙන මිනිස්සු අතරේ ලෙඩ නැතුව (කෙලෙස් නැතුව) අපි හරිම සුවෙන් ජීවත් වෙනවා.

(සැප) හොය හොය දඟලන මිනිස්සු අතරේ, එහෙම දැඟලිල්ලක් නැතුව අපි හරිම සුවෙන් ජීවත් වෙනවා.

අපිට කියලා කිසි දෙයක් (කෙලෙස්) නැහැ. අපි හරිම සුවෙන් ජීවත් වෙනවා. ආභස්සර බ්‍රහ්ම ලෝකේ දෙවියෝ වගේ අපි ප්‍රීතියම ආහාර කරගෙන ඉන්නවා.

දිනපු කෙනාට වෛරකාරයෝ ඇති වෙනවා. පැරදුණ කෙනා දුකෙන් ඉන්නවා. ජය පරාජය දෙකම අතහැරපු, සංසුන් වුන කෙනා සුවසේ ඉන්නවා.

රාගය වගේ ගින්නක් නෑ. ද්වේෂය වගේ අපරාධයක් නෑ. මේ ශරීරය (ස්කන්ධ) වගේ දුකක් නෑ. නිවනට වඩා සැපක් නෑ.

බඩගින්න තමයි ලොකුම ලෙඩේ. සංස්කාර (සකස් වුන දේවල්) තමයි ලොකුම දුක. මේක ඇත්ත ඇති සැටියෙන් දැනගත්තම, නිවන තමයි පරම සැපය.

නිරෝගීකම පරම ලාභයයි. සතුට පරම ධනයයි. විශ්වාසවන්තකම හොඳම නෑදෑකමයි. නිවන පරම සැපයයි.

විවේකයේ රසය බීලා, සිත නිවීමේ රසය බීලා, ධර්ම ප්‍රීතිය නමැති රසය බොන කෙනාට බියක් නෑ, පවක් නෑ.

ආර්යයන් වහන්සේලා දැකීම යහපත්. උන්වහන්සේලා එක්ක ඉන්න එක සැපක්. අඥානයන්ව දකින්නේ නැතුව ඉන්න තරමට නිබඳවම සැප ලැබෙනවා.

අඥානයෙක් එක්ක යන කෙනාට ගොඩක් කල් දුක් වෙන්න වෙනවා. ඒක හතුරෙක් එක්ක ඉන්නවා වගේ දුකක්. ඒත් නුවණැත්තෙක් එක්ක ඉන්න එක නෑදෑයෝ එක්ක ඉන්නවා වගේ සැපක්.

ඒ නිසා ධෛර්යවන්ත, ප්‍රඥාවන්ත, බහුශ්‍රැත, සිල්වත්, ආර්ය සත්පුරුෂයන්ව ඇසුරු කරන්න. හරියට හඳ තරු පංතිය ඇසුරු කරනවා වගේ.