මා විසින් මෙසේ අසන ලදී. එක් කලෙක භාග්‍යවතුන් වහන්සේ සැවැත් නුවර ජේතවන නම් වූ අනේපිඬු සිටුතුමාගේ ආරාමයේ වැඩ වසන සේක. එකල්හි එක්තරා දෙවියෙක්, රෑ බෝ වූ වෙලාවක මුළු ජේතවනයම ඒකාලෝක කරගෙන බුදුරදුන් වෙත පැමිණියේය.

පැමිණ, බුදුරජාණන් වහන්සේට වැඳ එකත්පස්ව සිටියේය. එසේ සිටි ඒ දෙවියා බුදුරදුන්ට ගාථාවකින් මෙසේ පැවසුවේය.

දියුණුව කැමති බොහෝ දෙවියෝ සහ මිනිස්සු 'මංගල කරුණු' මොනවාදැයි සිතුවා. (නමුත් තීරණයකට එන්න බැරි වුණා). ස්වාමීනි, අපට ඒ උතුම් මංගල කරුණු දේශනා කරන සේක්වා!

අඥානයන් ඇසුරු නොකිරීමත්, නුවණැත්තන් ඇසුරු කිරීමත්, පිදිය යුත්තන් පිදීමත් යන මෙය උතුම් මංගල කරුණකි.

සුදුසු ප්‍රදේශයක වාසය කිරීමත්, පෙර කළ පින් ඇති බවත්, තමාගේ සිත යහපතෙහි පිහිටුවා ගැනීමත් යන මෙය උතුම් මංගල කරුණකි.

බොහෝ ඇසූ පිරූ තැන් ඇති බවත් (උගත්කම), ශිල්ප දැනීමත්, මනා හික්මීමත් (විනය), යහපත් වචන කතා කිරීමත් යන මෙය උතුම් මංගල කරුණකි.

මව්පියන්ට සැලකීමත්, අඹු දරුවන්ට සංග්‍රහ කිරීමත්, නිරවුල් කර්මාන්ත කිරීමත් යන මෙය උතුම් මංගල කරුණකි.

දන් දීමත්, ධර්මයේ හැසිරීමත්, නෑදෑයන්ට සංග්‍රහ කිරීමත්, නිවැරදි වැඩ කිරීමත් යන මෙය උතුම් මංගල කරුණකි.

පව් කිරීමට සිතින් ඈත් වීමත්, කයින් වචනයෙන් වැළකීමත්, මත්පැන් පානයෙන් වැළකීමත්, කුසල් දහම්හි පමා නොවීමත් යන මෙය උතුම් මංගල කරුණකි.

ගරු කළ යුත්තන්ට ගරු කිරීමත්, යටහත් පහත් බවත්, සතුටු වන බවත්, කළගුණ සැලකීමත්, සුදුසු වෙලාවට බණ ඇසීමත් යන මෙය උතුම් මංගල කරුණකි.

ඉවසීමත්, කීකරු බවත්, ශ්‍රමණයන් වහන්සේලා දැකීමත්, සුදුසු වෙලාවට ධර්ම සාකච්ඡා කිරීමත් යන මෙය උතුම් මංගල කරුණකි.

ඉන්ද්‍රිය දමනය කිරීමත් (තපස), බ්‍රහ්මචරියාවත්, චතුරාර්ය සත්‍යය දැකීමත්, නිවන් අවබෝධ කරගැනීමත් යන මෙය උතුම් මංගල කරුණකි.

අටලෝ දහමින් කම්පා නොවන, ශෝක නැති, කෙලෙස් නැති, බිය නැති සිතක් ඇති කරගැනීම උතුම් මංගල කරුණකි.

මෙවැනි මංගල කරුණු සිදු කළ අය, කිසි තැනක පරාජය නොවී, සැම තැනම සුවසේ වෙසෙති. එය ඔවුන්ගේ උතුම් මංගලයයි.